Psa 118 | YON | STEP | Yariman kuu amun kowe, ye yaa eso andem, amborom kuu ye womoniyiibban ye mimyob dowaken kuu aron korem angkimbaraneen kowe.

Psalms 118

Yook 118

1 Yariman kuu amun kowe, ye yaa eso andem,
amborom kuu ye womoniyiibban ye mimyob dowaken kuu aron korem angkimbaraneen kowe.
2 Israeldan kuu kwane yedmime,
“Ye womoniyiibban ye mimyob dowaken kuu aron korem angkimbaraneen.” andime.
3 Eeron ye awoya ari kuu kwane yedmime,
“Ye womoniyiibban ye mimyob dowaken kuu aron korem angkimbaraneen.” andime.
4 Kane kane kuuYariman yaa unimaib kuu kwane yedmime,
“Ye womoniyiibban ye mimyob dowaken kuu aron korem angkimbaraneen.” andime.
5 Ne niindem aom kuu miin yiminban keroon kumbedYariman yaa baandaana,
ne yaa inanduwe ne nen burudande obon kere ongmewoon.
6 Yariman kuu ne yaa doreen kowe ne kuu unainban.
Kedi, karub kuu ne yaa kuu komo keruwaniib? Dowan.
7 Yariman kuu ne yaa doreen, ye kuu awawi ye karub.
Kwana kowe, ne bondan yaa kuu nangme burudande doraneene wedmaniin.
8 Yariman ye kukbimaanbon aom dobiri kuu miin amun,
karub yaa angkumone dobiri arebban.
9 Yariman ye kukbimaanbon aom dobiri kuu miin amun,
korok korok yaa angkumone dobiri arebban.
10 Ambibkin koremdan kuu ne yaa bon kere kanawanewandiwen kumban,
Yariman yaningko yaambed yi aromkono nare monmaraan.
11 Yi kuu ne yaa kanawanewandiwen, eyokee, yi kuu ne kiwaan kebene kanawanewandiwen kumban,
Yariman yaningko yaambed yi aromkono nare monmaraan.
12 Yi kuu mong areb ne yaa kanawanewande nimingkiwen kumban,
yi kuu yik deneene kirodmo kumunderemoon areb keriwen,
Yariman yaningko yaambed yi aromkono nare monmaraan.
13 Ne yaa kuu naawonmo ana nangmiiwe kombaraniin andaan,
kumbanYarimanbed awawoon.
14 Yariman kuu ne aromkono angkon ne yook,
kwane ye kuu ne nen burudande angka kowi ye karub keroon.
15 Kube komkiyiib burudande dori ye baandiyiib kuu
yorokmodan yi ambib kombon aom kuweng ooneen kii.
“Yariman ye dingki wiwi yaromkonombed kwanoon kii!
16 Yariman ye dingki wiwi kuu kankoone ari kaimbed keroon kii!
Yariman ye dingki wiwi yaromkonombed kwanoon kii!” ande kamiib.
17 Ne kuu bobnainban wad dobereni,
Yarimanbed komo komo ambangkanaboon kuu nembed ben dakmenabaniin.
18 Yarimanbed ne yaa kuu naawonmo didangkawoon,
kumban ne kuu nen bobni ari kowe korondoona bobnindo.
19 Yorokmodan awudirimaib ye kuuk wirinimbon ye ambongko kuu ne yaa nande.
Kwanebko ne kuu awudereniYariman yaa eso anda.
20 Ambongko keyiib keeYariman yeman kii,
kwane yorokmodan kuu ambongko kumbed aom awunimaib.
21 Eb kuu ne baandi yaa inanduwewen kowe, eb yaa eso andaniin,
kwane eb kuu ne nen burudande angka kowi ye karub kerewen.
22 Bot kuu boyambib yenbidanbed kankorariwen kuu,
ambib kumundin amun yenbi ye dongka bot keroon.
23 KukuuYarimanbed kwane ongmoon kedi!
Nub indob ari kee wedmuwen kowe, binangke kubi darewoob keruwen kii!
24 Kibik aron keeYarimanbed ongmoon,
kowe nub kuu kuye dowad kubenub dowakeniib kamem.
25 OYariman, nub kuu arewa yaa burudande binde.
OYariman, nub kuu ongmebko yiminmo doberem.
26 Karub kane ye kuuYariman yaningko yaambed mananeen kuu ye yaa amun kerunok.
Kuye karub kuuYariman yambib yaa doruub kumbed amun kerunduub kii.
27 Yariman kuu God,
kwane yembed nambiri ongmoona nub ari yurendoon.
Yiib dingki aom kuu ambuudiib awingkenib, God yaa kubi dowad nedbe God yaa koni ye bot wuubimbon yaa daane weniibdan yoom dabokne winime.
28 Eb kuu ne God, kwane eb yaa eso andaniin.
Eb kuu ne God, kwane ewaningko kankoonaniin.
29 Yariman kuu amun kowe, ye yaa eso andem.
amborom kuu ye womoniiibban ye mimyob dowaken kuu aron korem kwane angkimbaraneen kowe.